უკრაინის პრეზიდენტი, ვოლოდიმირ ზელენსკი აშშ-ის პრეზიდენტის წარმომადგენლებს სტიფ უიტკოფსა და ჯარედ კუშნერს ესაუბრა, - ინფორმაციას უკრაინის პრეზიდენტი ავრცელებს.

„კარგი სატელეფონო საუბარი მქონდა პრეზიდენტ ტრამპის წარმომადგენლებთან, სტივ უიტკოფთან და ჯარედ კუშნერთან. ეს დეტალური და კონსტრუქციული საუბარი იყო. მნიშვნელოვანია, რომ აშშ-ისა და უკრაინის გუნდებს შორის დიალოგი მუდმივად გრძელდება და ახლა ჩვენ უკრაინაში ვიზიტის თარიღის საბოლოოდ დადგენას განვიხილავთ. ეს ვიზიტი ძალიან სასარგებლო იქნება მშვიდობის მისაღწევად გადაწყვეტილებების შემუშავებისთვის“, - წერს ზელენსკი X-ზე.

მისი თქმით, აშშ-ის პრეზიდენტის, დონალდ ტრამპის წარმომადგენლებს ბრძოლის ველზე არსებული ვითარების შესახებ ინფორმაცია მიაწოდა.

„სტივმა და ჯარედმა ბევრი დეტალი იციან. ჩვენი გუნდები კონტაქტში დარჩებიან, რათა დღის წესრიგი და შემდგომი კომუნიკაციისთვის ყველაზე მოსახერხებელი განრიგი შეიმუშაონ“, - აცხადებს ზელენსკი.