ირაკლი ფავლენიშვილი - პოლიტიკური განცხადება არ არის გიორგი ბარამიძის დაკავების საბაბი, საბაბია ამ პოლიტიკური განცხადების ინტერპრეტაცია - ბარამიძის დაკავების ბრძანება რუსულმა იმპერიამ გასცა 1 წლის წინ
ფაქტობრივად, გიორგი ბარამიძეს პატიმრობა მიესაჯა რუსეთის მიერ. როგორც ყველაფერში, აქაც მოახდინეს დაკოპირება პუტინის ინსტრუქციის და რუსეთის მსგავსად შეუფარდეს პატიმრობა უკვე საქართველოში, - ამის შესახებ „ერთიანი ნაციონალური მოძრაობის“ მმართველობითი საბჭოს თავმჯდომარემ, ირაკლი ფავლენიშვილმა პროკურატურასთან პარტიის ლიდერებთან ერთად გამართულ ბრიფინგზე განაცხადა.
მისი თქმით, ეს არის შურისძიება „ნაციონალური მოძრაობის“ და მისი ერთ-ერთი ლიდერის, გიორგი ბარამიძის წინააღმდეგ.
„ის მთელი მისი შეგნებული ცხოვრების მანძილზე იბრძვის თავისუფალი, ძლიერი საქართველოსთვის. ის იბრძოდა იარაღით ხელში აფხაზეთში, ჩვენი ტერიტორიული მთლიანობისთვის და ამის შემდეგ ის მუდმივად იბრძოდა პოლიტიკურად, მათ შორის მას აქვს განხორციელებული რეფორმები, რომლითაც შეიქმნა ძლიერი ქართული სახელმწიფო ინსტიტუციები. მისი მიზანი ყოველთვის იყო ქართული სახელმწიფოსთვის სასარგებლო საქმე.
პოლიტიკური განცხადება არ არის ბარამიძის დაკავების საბაბი. საბაბია ამ პოლიტიკური განცხადების ინტერპრეტაცია. მან მკაფიოდ განმარტა, რომ ის შინაარსი მას არ უგულისხმია. ამის მიუხედავად დააკავეს, რატომ? იმიტომ, რომ ბარამიძის დაკავების ბრძანება რუსულმა იმპერიამ გასცა 1 წლის წინ. ფაქტობრივად, მას პატიმრობა მიესაჯა რუსეთის მიერ, როგორც ყველაფერში, აქაც მოახდინეს დაკოპირება პუტინის ინსტრუქციის და რუსეთის მსგავსად შეუფარდეს პატიმრობა უკვე საქართველოში”,- განაცხადა ფავლენიშვილმა.
ცნობისთვის, პროკურატურის ინფორმაციით, „ნაციონალური მოძრაობის" ერთ-ერთი ლიდერი გიორგი ბარამიძე სამშობლოს ღალატის, კერძოდ საბოტაჟის ბრალდებით დააკავეს. საქმე ეხება აფხაზეთის ომზე ბარამიძის მიერ გაკეთებულ განცხადებას. აღნიშნული ბრალდება სასჯელის სახედ და ზომად 4 წლამდე თავისუფლების აღკვეთას ითვალისწინებს.
