რეგიონული განვითარების და ინფრასტრუქტურის სამინისტროები ერთიანდება და კვლავ ერთ უწყებად ყალიბდება - მთავრობის შემადგენლობაში რეგიონული განვითარებისა და ინფრასტრუქტურის სამინისტრო იქმნება. იმავდროულად, უქმდება სამართალდამცავი ორგანოების კოორდინაციის საკითხებში სახელმწიფო მინისტრის პოსტი.

ამასთან დაკავშირებით “საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ კანონში ცვლილებების ახალი ვარიანტი და მისგან გამომდინარე პროექტები პარლამენტის ბიუროს უკვე წარედგინა. საკანონმდებლო პაკეტს დაჩქარებული წესით განიხილავენ.

ამავე პროექტის გათვალისწინებით, მთავრობის ადმინისტრაციას გადაეცემა სახელმწიფო რწმუნებულებსა და მუნიციპალიტეტის ორგანოებთან ურთიერთობის კოორდინაციის და ხელშეწყობის ფუნქცია.

შეგახსენებთ, რომ მთავრობის სტრუქტურაში ცვლილებების მიმართულებით მთავრობის მეთაურს სულ სხვა ინიციატივა ჰქონდა წარდგენილი. პარლამენტის საშემოდგომო სესიის გახსნისას, ბიუროს პირველივე სხდომაზე მთავრობის საკანონმდებლო პაკეტი გავიდა, რომელიც მთავრობის შემადგენლობაში ახალი თანამდებობის - რეგიონების პოლიტიკის საკითხებში სახელმწიფო მინისტრის პოსტის შექმნას ითვალისწინებდა. რეგიონების პოლიტიკის საკითხებში სახელმწიფო მინისტრის თანამდებობა რეგიონული განვითარების სამინისტროს ბაზაზე იქმნებოდა, თუმცა პარლამენტში ინიცირებული პროექტი მთავრობამ უკან გაიტანა.

როგორც ცნობილია, რეგიონების პოლიტიკის საკითხებში სახელმწიფო მინისტრის პოსტი მამუკა მდინარაძეს უნდა დაეკავებინა. მდინარაძემ მთავრობა დატოვა და პოლიტიკიდან წასვლის თაობაზეც გააკეთა განცხადება.