აშშ-მა დიდი ბრიტანეთის სამხედრო ბაზიდან ბომბდამშენები უსაფრთხოების ზომებიდან გამომდინარე გაიყვანა, - ამის შესახებ აშშ-ის ვიცე-პრეზიდენტმა, ჯეი დი ვენსმა განაცხადა.

„ომის მდივანი, განსაკუთრებული სიფრთხილიდან გამომდინარე, ჩვენი ბიჭების დაცვას ცდილობს. დარწმუნებით ვფიქრობთ, რომ ირანელები ცდილობენ ის გააკეთონ, რასაც 49 წელია აკეთებენ, რაც ტერორისტული აქტებია აშშ-ისა და სხვების წინააღმდეგ. ასე რომ, ჩვენ სიფრთხილეს ვიჩენთ“, - განაცხადა ვენსმა.

მანამდე, აშშ-ის სახელმწიფო მდივანმა მარკო რუბიომ აღნიშნა, რომ ბომბდამშენების გაყვანასა და ირანის მხრიდან სავარაუდო შეთქმულებას შორის პირდაპირი კავშირი არ არსებობს.

მისი თქმით, პენტაგონი „მუდმივად ახდენს რესურსების გადაყვანას იქ, სადაც ამის საჭიროება არსებობს“.

შეგახსენებთ, აშშ-მა გაერთიანებული სამეფოს RAF Fairford-ის ავიაბაზიდან B-1 ტიპის ბომბდამშენები გაიყვანა მას შემდეგ, რაც ლონდონთან ახლოს ტერორისტული აქტების მომზადებაში ეჭვმიტანილი რამდენიმე პირი დააკავეს. თვითმფრინავები ირანზე აშშ-ის მიერ განხორციელებული დარტყმებისთვის გამოიყენებოდა. დიდი ბრიტანეთის პრემიერ-მინისტრმა ენდი ბერნემმა განაცხადა, რომ გაერთიანებულ სამეფოს „მტკიცე ნიშნები“ აქვს, რომ ბაზის წინააღმდეგ ტერორისტული აქტების სავარაუდო შეთქმულებაში ირანი მონაწილეობდა. ირანმა ბრალდებებს უსაფუძვლო უწოდა.