მიზნობრივი სანქციები და სავიზო აკრძალვები უნდა შემოვიღოთ, განსაკუთრებით მოსამართლეების წინააღმდეგ, რომლებიც საქართველოში პოლიტიკურად მოტივირებულ დევნას უშვებენ. ამის შესახებ ევროპარლამენტარმა დაინიუს ჟალიმასმა ევროპარლამენტში “ქართული ოცნების” მიერ ოპოზიციური პარტიები აკრძალვის მცდელობების თაობაზე გამართულ დებატებზე განაცხადა.

ევროპარლამენტარის თქმით, საქართველოში პოლიტიკური პარტიების აკრძალვის მცდელობების ფონზე „უნდა ვაღიაროთ, რომ საქართველოში ავტორიტარულ კონსოლიდაციაზე ევროპის პასუხი ამ დროისთვის შეუსაბამო“ იყო.

„აშშ, გაერთიანებული სამეფო და ევროკავშირის ინდივიდუალური წევრი სახელმწიფოები უფრო შორს წავიდნენ ქართველი ხალხის რეპრესიებზე პასუხისმგებელი პირების დასანქცირებაში.

ეს სხვაობა უნდა ავანაზღაუროთ. პირველ რიგში, მიზნობრივი სანქციები და სავიზო აკრძალვები უნდა შემოვიღოთ, მათ შორის და განსაკუთრებით მოსამართლეების წინააღმდეგ, რომლებიც პოლიტიკურად მოტივირებულ დევნას უშვებენ. მეორე, საქართველოს ხელისუფლებასთან ჩართულობა დამოკიდებული უნდა იყოს ხელშესახებ ნაბიჯებზე ამ კურსის შესაცვლელად, “ვენეციის კომისიის” რეკომენდაციების იმპლემენტაციაზე, რომლებიც საგზაო რუკაა სასამართლო სისტემის დამოუკიდებლობისა და პოლიტიკური პლურალიზმის აღსადგენად. მესამე, უნდა აღვკვეთოთ საპოლიციო აღჭურვილობის საქართველოსთვის მიყიდვა ან გადაცემა, რომელიც შესაძლოა გამოყენებულ იქნას რეპრესიებისთვის. და ბოლოს, ევროპამ უნდა გააძლიეროს პირდაპირი მხარდაჭერა დამოუკიდებელი მედიისთვის, პოლიტიკური პარტიებისთვის, სამოქალაქო საზოგადოებისთვის, და ამავდროულად მათ გათავისუფლებას მოითხოვდეს, ვინც პოლიტიკური მოტივებით არის დაპატიმრებული,” - განაცხადა ჟალიმასმა.