რუსეთის რიაზანის ოლქის ქალაქ სასოვოში, ქარხანა „სასტას“ ტერიტორიაზე ხანძარი გაჩნდა, - სოციალურ ქსელებში გავრცელდა ინფორმაცია, რომ ქარხანაზე თავდასხმა განხორციელდა.

უკრაინული მედია წერს, რომ აღნიშნულ ტერიტორიაზე შპს „იანდექს დც“-ის მონაცემთა ცენტრი მდებარეობს, რომელსაც რუსეთის სამხედრო-სამრეწველო კომპლექსისთვის მნიშვნელოვანი ფუნქცია აქვს.

Astra-ს ცნობით, მისმა OSINT-ანალიტიკოსმა თვითმხილველების მიერ გადაღებული კადრების საფუძველზე დაადგინა, რომ ხანძარი ჩარხთმშენებელი ქარხანა „სასტას“ ტერიტორიაზე გაჩნდა. Wikimapia-ს მონაცემებით, ამავე ტერიტორიაზე მდებარეობს შპს „იანდექს დც“-ის მონაცემთა ცენტრი.

გასულ თვეში მონაცემთა ცენტრის თანამშრომლებმა თავად გაავრცელეს მისი აღჭურვილობის ამსახველი კადრები და პირდაპირ განაცხადეს, რომ ცენტრი რუსეთის ფედერაციის რიაზანის ოლქის ქალაქ სასოვოში მდებარეობს. “ტელეგრამ” არხი Astra განმარტავს, რომ კომპანია „სასტას“ მნიშვნელობა რუსეთის სამხედრო-სამრეწველო კომპლექსისთვის არა მზა შეიარაღების წარმოებაში, არამედ საწარმოო ბაზის უზრუნველყოფაში მდგომარეობს - მისი ჩარხები აუცილებელია მაღალი სიზუსტის ლითონის დეტალებისა და კვანძების დასამზადებლად.

ადრე „სასტა“ სპეციალურ ჩარხებს „როსკოსმოსის“ საწარმოებს აწვდიდა. საწარმო ასევე დასანქცირებულია კანადის, შვეიცარიის, ევროკავშირის, გაერთიანებული სამეფოს, ავსტრალიის, ახალი ზელანდიის, აშშ-ისა და იაპონიის მიერ.

ამასთან, გავრცელებული ინფორმაციით, სასოვოში „იანდექსის“ მონაცემთა ცენტრზე თავდასხმის შემდეგ კომპანიის მუშაობაში მასშტაბური შეფერხება დაფიქსირდა.კერძოდ, დაფიქსირდა ელექტრომომარაგებასთან დაკავშირებული შეფერხებები, რის გამოც Yandex Cloud-ის ინფრასტრუქტურის ფართო სპექტრი მიუწვდომელი გახდა.