მასუდ პეზეშკიანი დსთ-ის სამიტზე - ირანი თანამშრომლობის განვითარების მიზნით „დსთ+1“ ფორმატის შექმნას გთავაზობთ
ირანის პრეზიდენტი მასუდ პეზეშკიანი დსთ-ის სამიტზე ორგანიზაციასა და თეირანს შორის თანამშრომლობის განვითარების მიზნით „დსთ+1“ ფორმატის შექმნის შეთავაზებით გამოვიდა, - ინფორმაციას რუსული მედია ავრცელებს.
მისი თქმით, ირანი საკუთარ თავს რეგიონის ურთიერთდაკავშირებული გეოგრაფიის ბუნებრივ ნაწილად მიიჩნევს და ეს კავშირი არა მხოლოდ გეოგრაფიულია, არამედ ისტორიაში, კულტურასა და ხალხებს შორის კონტაქტებშიც აისახება.
“ირანი მოქნილი და ეფექტიანი დიალოგისა და თანამშრომლობის მექანიზმის - „დსთ-ის ქვეყნები პლუს ირანი“ ან „დსთ+1“ ფორმატის - შექმნის შეთავაზებით გამოდის”, - განაცხადა ირანის პრეზიდენტმა დსთ-ის სამიტზე, რომელშიც ის პირველად მონაწილეობს.
პეზეშკიანის თქმით, აღნიშნული ინიციატივის განხორციელება ხელს შეუწყობს ერთობლივი მუშაობის განვითარებას ისეთ სფეროებში, როგორიცაა ტრანზიტი, ენერგეტიკა, ვაჭრობა, სამთო მოპოვება, ინვესტიციები, ტექნოლოგიები, წყლის რესურსები და გარემოს დაცვა, ტურიზმი, ასევე სამეცნიერო და კულტურული კავშირები.
