პოლონეთის უსაფრთხოების სამსახურებმა საგანგებო შეხვედრა გამართეს მას შემდეგ, რაც მიიღეს ინფორმაცია პრემიერ-მინისტრ დონალდ ტუსკსა და თავდაცვის მინისტრ ვლადისლავ კოსინიაკ-კამიშზე შესაძლო თავდასხმის შესახებ, - ამის შესახებ შინაგან საქმეთა სამინისტროს პრესსპიკერმა, კაროლინა გალეცკამ სოციალურ ქსელ X-ზე დაწერა.

მას საფრთხის ზუსტი ხასიათი და წყარო არ დაუსახელებია.

“შესაძლო თავდასხმის შესახებ პოლონეთის პოლიციის მიერ მიღებული ინფორმაციის საფუძველზე, შინაგან საქმეთა მინისტრმა მარცინ კიერვინსკიმ და სპეციალური სამსახურების კოორდინატორმა მინისტრმა ტომაშ სემონიაკმა ამ საკითხთან დაკავშირებით შესაბამისი ზომების მიღების ბრძანება გასცეს”, - განაცხადა შინაგან საქმეთა სამინისტროს პრესსპიკერმა.

ცნობისთვის, პოლონურმა კერძო მაუწყებელმა Radio Zet-მა გაავრცელა ინფორმაცია, რომ პოლიციამ საფრთხის შესახებ ინფორმაცია ელექტრონული წერილის სახით მიიღო.