უკრაინა არჩევნებს ჩაატარებს იმ შემთხვევაში, თუ რუსეთის პრეზიდენტი ვლადიმერ პუტინი 60-დღიან ცეცხლის შეწყვეტას დათანხმდება, - ამის შესახებ უკრაინის პრეზიდენტმა ვოლოდიმირ ზელენსკიმ ABC News-თან ინტერვიუში განაცხადა.

აშშ-ის პრეზიდენტ დონალდ ტრამპის განცხადებაზე კომენტირებისას, რომლის თქმითაც, “დროა, უკრაინას ახალი პრეზიდენტი ჰყავდეს”, ზელენსკიმ აღნიშნა, რომ უკრაინა ომშია და არჩევნების ჩატარება „კონსტიტუციის ჩარჩოებს სცილდება“. მისი თქმით, რაც ყველაზე მთავარია, არ არსებობს უსაფრთხო პირობები იმისთვის, რომ ხალხს ხმის მიცემის საშუალება მიეცეთ.

“პრეზიდენტმა ტრამპმა განაცხადა, რომ უკრაინას ახალი პრეზიდენტი სჭირდება. უპირველეს ყოვლისა, პრეზიდენტ ტრამპის მიმართ სრული პატივისცემის მიუხედავად, ამა თუ იმ ლიდერის არჩევა ჩვენი საზოგადოებისა და ხალხის გადასაწყვეტია. დიახ, ჩვენ ომში ვართ და არჩევნების ჩატარება მართლაც რთულია. საქმე მხოლოდ უსაფრთხოების ნაკლებობასა და კანონმდებლობასა თუ კონსტიტუციასთან შეუსაბამობაში არ არის, მთავარია შესაბამისი უსაფრთხოების ინფრასტრუქტურის არსებობა, რათა ხალხს ხმის მიცემის შესაძლებლობა ჰქონდეს. რა თქმა უნდა, თავად უკრაინელების გადასაწყვეტია, როდის და როგორ ჩაატარონ არჩევნები და ვის მისცენ ხმა. რაც შეეხება ამ საკითხს - ვიცი, რომ პუტინს ძალიან სურდა უკრაინაში პრეზიდენტის შეცვლა; ეს მესმის. ასე რომ, გთხოვთ, უთხარით პუტინს, მოგვცეს ორი თვე, 60-დღიანი პაუზა. ცეცხლის სრული შეწყვეტა 60 დღით - და ჩვენ არჩევნებს ჩავატარებთ. რა თქმა უნდა, მზად ვიქნებით ჩვენი ხალხის - სწორედ უკრაინელი ხალხის - ნებისმიერი არჩევანისთვის”, - აღნიშნა ზელენსკიმ.