აბსურდი როგორ მოვინანიო?, – ამის შესახებ 4 ოქტომბრის საქმეზე მსჯავრდებული ოპოზიციონერი პოლიტიკოსი, პაატა მანჯგალაძე წერილში წერს და საპროცესო შეთანხმებების ირგვლივ მიმდინარე დისკუსიას ციხიდან პასუხობს.

გავრცელებულ წერილში მანჯგალაძე მოუწოდებს საზოგადოებას, ნუ გამოაცხადებენ მოღალატეებად მათ, ვინც საპროცესო შეთანხმებაზე წავიდა, რადგან არსებულ პირობებში ადამიანების თავისუფალი არჩევანია.

ოპოზიციონერი მის წინააღმდეგ არსებულ ბრალდებას აბსურდულს უწოდებს და ხელისუფლებას აფრთხილებს, მომავალში მათაც იგივე მიდგომები არ მიუბრუნდეთ.

„მოგესალმებით, მეგობრებო. მინდა, გამოვეხმაურო საპროცესო გარიგებებთან საჯარო სივრცეში გავრცელებულ რამდენიმე საკითხს:

მესმის, დიდია ცდუნება ვაკრიტიკოთ ერთმანეთი, თუმცა, შეუმცდარები არც ერთი არ ვართ. შესაბამისად, ჩვენთვის მიუღებელი ან განსხვავებული პოზიცია არ ნიშნავს ავტომატურად ღალატს ან ვინმეს მოღალატედ გამოცხადების შესაძლებლობას;

არსებულ პირობებში საპროცესო შეთანხმება იქნება თავისუფალი არჩევანი და ჩვენ უნდა შევძლოთ მათი გაგება, ვინც ეს ნაბიჯი გადადგა.

არ ვთვლი, რომ ჰუმანიზმი და ქრისტიანობაა ადამიანს დააბრალო დანაშაული, დააკავო უკანონოდ, შემდეგ ისეთი პირობები შეუქმნა რომ აღიაროს და მოინანიოს ის, რაც არ ჩაუდენია, ვგულისხმობ, ჩემს შემთხვევას, როცა მოსამართლემ პირდაპირ გადააკოპირა ბრალის აღწერისას ბრალდების მტკიცება, თითქოს 2025 წლის 4 ოქტომბერი დავაორგანიზე 2024 წლის ოქტომბერში, ანუ ერთი წლით ადრე გაკეთებული განცხადებებით. ეს აბსურდი როგორ მოვინანიო? ან რა მოვინანიო?

ადრე გაცხადებულ, ნულოვან თანაგრძნობასთან შედარებით, რა თქმა უნდა, შესამჩნევია ხელისუფლების ნების ცვლილება, მაგრამ ადამიანს აღიარებინო ის, რაც არ ჩაუდენია, ვერ ჩაითვლება ჰუმანურობად.

იმედი მაქვს, გააცნობიერებენ გადაწყვეტილების მიმღებებიც, რომ მომავალში მათაც იგივე ცული არ მიეზღოთ, რითაც დღეს ჭრიან", - წერს პაატა მანჯგალაძე წერილში, რომელსაც პრესსამსახური ავრცელებს.