აფხაზეთში დისლოცირებული რუსი მესაზღვრეები სოფელ ანაკლიასთან საქართველოს ორი მოქალაქის დაკავების შესახებ ინფორმაციას უარყოფენ. როგორც საინფორმაციო სააგენტო “აპსნი პრესი” იუწყება, ამის შესახებ აფხაზეთში რუსეთის სასაზღვრო სამსახურის პრესმდივანმა ვასილი მალაევმა განაცხადა.
;“ეს ცრუ ინფორმაციაა. რუსული სასაზღვრო გემები, რომლებიც აფხაზეთის საზღვაო საზღვარს იცავენ, არ გასულან ქართული წყაროების მიერ დასახელებულ რაიონში”, - განაცხადა მალაევმა.;;
;ქართული მხარის ინფორმაციით, რუსმა მესაზღვრეებმა ზუგდიდის რაიონის სოფელ ანაკლიასთან ახლოს თევზაობისას ორი ანაკლიელი და გალის რაიონის სოფელ ფიჩორას ორი მკვიდრი დააკავეს და სოხუმში გადაიყვანეს. მოგვიანებით, აფხაზურმა მხარემ მხოლოდ ფიჩორელი მეთევზეები გაათავისუფლა.
;