პროკურორებმა სამართლებრივ თემებზე თბილისის 54-ე საჯარო სკოლაში ისაუბრეს
საქართველოს პროკურატურის თანამშრომლებმა დღეს გაკვეთილები სამართლებრივ თემებზე თბილისის 54-ე საჯარო სკოლის მოსწავლეებს ჩაუტარეს.
როგორც “ინტერპრესნიუსს” პროკურატურიდან აცნობეს, მთავარი პროკურორის პირველი მოადგილე დავით საყვარელიძე მოსწავლეებს იმ ერთობლივი კამპანიის შესახებ ესაუბრა, რომელიც საქართველოს პროკურატურამ, შინაგან საქმეთა და განათლებისა და მეცნიერების სამინისტროებმა არასრულწლოვნებში დანაშაულის პრევენციის მიზნით წამოიწყეს.
შეხვედრას, პროკურატურის წარმომადგენლების გარდა, განათლებისა და მეცნიერების მინისტრის მოადგილე ირინა ქურდაძეც დაესწრო.
მთავარი პროკურორის პირველმა მოადგილემ აღნიშნა, რომ საჯარო სკოლების უსაფრთხოების უზრუნველყოფა ერთი რომელიმე უწყების პრეროგატივა არ არის და ის კომპლექსურ მიდგომას საჭიროებს. პროცესში, სამართალდამცველებისა და პედაგოგების გარდა, აუცილებლად უნდა იყოს ჩართული თითოეული მოსწავლე.
ამ მიზნით პროკურატურა დღეიდან პლაკატების კონკურსს აცხადებს. ვი იარაღის ტარების წინააღმდეგ საუკეთესო პლაკატის ავტორი ფასიანი საჩუქრებით დაჯილდოვდება. იგივე თემაზე უკვე გამოცხადებულია კონკურსი საუკეთესო დევიზის გამოსავლენად.
არასრულწლოვანთა დანაშაულის პრევენციის კამპანია 1 თებერვალს დაიწყო და მთელი წლის განმავლობაში გაგრძელდება. საქართველოს პროკურატურამ 2010 წელი არასრულწლოვანთა დანაშაულის პრევენციის წლად გამოაცხადა, პროკურორები პერმანენტულად ჩაატარებენ სამართლებრივ თემებზე სკოლებში გაკვეთილებს, გაიმართება სპორტული შეჯიბრებები, კონკურსები, აქციები.
v-if="article.gallery" v-html="article.gallery"
