;ავიაკომპანია „არმავიას“ ბილეთები, რომლითაც შესაძლებელია ერევნის გავლით მოსკოვში მგზავრობა, ავიაკომპანია „აირზენას“ სალაროებში გაიყიდება.
როგორც „ინტერპრესნიუსს“ „აირზენას“ საზოგადოებასთან ურთიერთობის სამსახურის უფროსმა ნინო გიორგობიანმა განუცხადა, მათი ავიაკომპანია „არმავიას“ ოფიციალური პარტნიორია.
„ბილეთის ფასი 170 ევროდან იწყება. ფრენები თბილისი-ერევანი-თბილისისა და ერევანი-თბილისი-ერევანის მიმართულებით ყოველდღე, დღეში ორჯერ იქნება. რეისები ერევნიდან მოსკოვშიც შესრულდება“,-განაცხადა გიორგობიანმა.
ერთიანი სატრანსპორტო ადმინისტრაციის ხელმძღვანელმა გიორგი ბოკუჩავამ დღეს განაცხადა, რომ ერევანი-თბილისი-ერევანის რეისების შესრულებასთან დაკავშირებით ნებართვა სომხურ ავიაკომპანია “არმავიას” მისცეს, რომელიც თავად გეგმავს თბილისიდან ერევნის გავლით მოსკოვში რეისების შესრულებას, რაშიც ქართული მხარე ვერ ჩაერევა.
„არმავია“ ერევანი-თბილისი-ერევანის მიმართულებით რეისების შესრულებას 10 მარტიდან დაიწყებს.
