აკაკი წერეთლის 20-ტომეულის პირველ ტომში პოეტის დღემდე უცნობი ლექსებია შესული
აკაკი წერეთლის 20-ტომეულის პირველ ტომში პოეტის დღემდე უცნობი ლექსებია შესული.
როგორც "ინტერპრესნიუსს" ლიტერატურის ინსტიტუტის მეცნიერ-თანამშრომელმა, ელისაბედ დარდიაშვილმა განუცხადა, აქამდე გამოუქვეყნებელ ლექსებს შორის არის რადიკალური ლექსი "სომხებს", სატრფიალო ლექსები, ასევე, აკაკის ლექსი მისი ქალიშვილის, სოფიოსადმი, რომელიც 2 წლამდე ასაკში გარდაიცვალა. ამ ლექსს "მამის მოთქმა" ჰქვია. საზოგადოებამ ამ დრომდე არ იცოდა, რომ აკაკის ქალიშვილიც ჰყავდა, რომელიც მის ვაჟზე, ალექსიზე უფროსი იყო.
"უცნობი ლექსების ნაწილი საბჭოთა კონიუნქტურული თვალსაზრისით არ გამოიცემოდა, ზოგიერთი კი, აკაკის არქივის გადახედვის დროს გახდა ცნობილი. 20-ტომეულის პირველ ტომში შესულია აკაკის მიერ 1856 წლიდან 1880 წლამდე დაწერილი, დღემდე გამოუქვეყნებელი ლექსები",- აღნიშნა დარდიაშვილმა.
წიგნი გამოსაცემად მოამზადეს ლიტერატურის ინსტიტუტის მეცნიერ-თანამშრომლებმა ელისაბედ დარდიაშვილმა და ზურაბ ჭუმბურიძემ. გამოცემა აკაკის 170 წლისთავისადმი მიძღვნილი სიმპოზიუმს მიეძღვნა, რომელიც სასტუმრო "შერატონ მეტეხი პალასში" დღეს გაიხსნა.
მე-4 საერთაშორისო სიმპოზიუმის ორგანიზატორია შოთა რუსთაველის ქართული ლიტერატურის ინსტიტუტი.
ღონისძიება ლიტერატურის ინსტიტუტის დირექტორმა, ირმა რატიანმა და თბილისის სახელმწიფო უნივერსიტეტის რექტორის მოვალეობის შემსრულებელმა სანდრო კვიტაშვილმა გახსნეს.
სიმპოზიუმს სხვადასხვა ქვეყნის 20-მდე სტუმარი ესწრებოდა, კერძოდ, დიდი ბრიტანეთიდან, იტალიიდან, პორტუგალიიდან, რუსეთიდან, უკრაინიდან, ლიტვიდან, თურქეთიდან და ყაზახეთიდან.
სიმპოზიუმი, ტრადიციულად, ყოველ წელს თბილისის სახელმწიფო უნივერსიტეტისა და კომპარატისტული ლიტერატურის ქართულ ასოციაციასთან თანამშრომლობით ტარდება.
v-if="article.gallery" v-html="article.gallery"
