ავიაკომპანია "Sunways Airlines"-ის კატასტროფის შედეგად უკრაინის 7 მოქალაქე დაიღუპა

უკრაინის საგარეო საქმეთა სამინისტროს ინფორმაციით, პაკისტანის ქალაქ ყარაჩში ქართული სატვირთო თვითმფრინავის "ილ 76"-ის ჩამოვარდნის შედეგად, უკრაინის 7 მოქალაქე დაიღუპა.

სააგენტო ინტერფაქსის ცნობით, თვითმფრინავის ეკიპაჟის წევრები, მათ შორის ბორტის მეთაური, მფრინავი, შტურმანი, ორი ავია-ტექნიკოსი, ბორტინჟინერი და ბორტრადისტი უკრაინის მოქალაქეები იყვნენ.

უკრაინის საგარეო უწყების პრესმდივნის ალექსანდრ დიკუსაროვის ინფორმაციით, უკრაინულ მხარეს ეს ინფორმაცია ქართულ ავიაკომპანია "Sunways Airlines"-ში დაუდასტურეს.

სატვირთო თვითმფრინავი ილ-76, რომელიც წუხელ პაკისტანის ქალაქ ყარაჩში ჩამოვარდა, ქართულ ავიაკომპანია "Sunways Airlines"-ს ეკუთვნოდა. ავიაკატასტროფის შედეგად 20 ადამიანი დაიღუპა.