იაპონიაში ტაიფუნმა 10 ადამიანი იმსხვერპლა

იაპონიაში ტაიფუნმა "ტალასმა", უკანასკნელი მონაცემებით, 10 ადამიანი იმსხვერპლა. ადგილობრივი მედიის ცნობით, 30 მოქალაქე ამ დრომდე უგზოუკვლოდ დაკარგულად ითვლება.

დღე-ღამის განმავლობაში იაპონიის კუნძულებზე მოსული ნალექის ოდენობამ ერთი თვის ნორმას გადააჭარბა. მდინარეები ნაპირიდან გადმოვიდა, წყლისა და ტალახის ნაკადებმა ქალაქის ქუჩები დატბორა. დაზიანებულია გზები და ხიდები. ასობით ადამიანი უსახლკაროდ დარჩა.

სამძებრო-სამაშველო სამუშაოები საგანგებო რეჟიმში მიმდინარეობს. დაზარალებულები დროებით თავშესაფრებში განათავსეს.

იაპონიის მინისტრთა კაბინეტის დავალებით შეიქმნა საგანგებო შტაბი, რომლის რეკომენდაციის საფუძველზე საშიში ზონებიდან 400 ათასზე მეტი მცხოვრების ევაკუაცია განხორციელდა.