გამოცდების ეროვნული ცენტრის ვებგვერდზე (www.naec.ge) 2012 წლის ერთიანი ეროვნული გამოცდებისათვის განკუთვნილი ცნობარი განთავსდა. ცნობარში მოცემულია ინფორმაცია უმაღლესი სასწავლებლების საგანმანათლებლო პროგრამების, მათ მიერ არჩეული გამოცდების, გამოცდებისათვის მინიჭებული კოეფიციენტების, უმაღლესი სასწავლებლების მიერ დაწესებული სპეციალური მოთხოვნების, სწავლების საფასურის შესახებ, ასევე, სხვა მნიშვნელოვანი ინფორმაცია, რომელიც აბიტურიენტს განაცხადის სწორად შევსებაში დაეხმარება.

ცნობარში დეტალურადაა განმარტებული პროცედურული საკითხებიც. გამოცდებისათვის რეგისტრაციის დაწყების თარიღს გამოცდების ეროვნული ცენტრი უახლოეს დღეებში გამოაქვეყნებს.

ცნობარი დაიბეჭდა გაზეთში ,,ახალი განათლება". ჯიხურების ჩამონათვალი, სადაც შესაძლებელია გაზეთის შეძენა, განთავსებულია გამოცდების ეროვნული ცენტრის ვებგვერდზე.

გამოცდების ეროვნულმა ცენტრმა დეკემბერში გამოსცა დამხმარე კრებულები, რომელთა შეძენა შესაძლებელია როგორც თბილისის, ასევე რეგიონების მაღაზიებში. მასწავლებლის ბიბლიოთეკის ეგიდით გამოცემული წიგნების შეძენა საქართველოს ფოსტის მეშვეობით ხორციელდება.