კაპრალი რევაზ ალავერდაშვილი სოფელ ნიჩბისის სასაფლაოზე დაკრძალეს

2008 წლის აგვისტოს ომის დროს დაღუპული კაპრალი რევაზ ალავერდაშვილი სოფელ ნიჩბისის სასაფლაოზე დაკრძალეს.

დაკრძალვას ესწრებოდნენ საქართველოს პრემიერ-მინისტრი ბიძინა ივანიშვილი, ასევე თავდაცვის, შინაგან საქმეთა და იუსტიციის მინისტრები - ირაკლი ალასანია, ირაკლი ღარიბაშვილი და თეა წულუკიანი.

დაკრძალვას ასევე ესწრებოდა მთავრობისა და საპარლამენტო უმრავლესობის რამდენიმე წევრიც.

როგორც ბიძინა ივანიშვილმა ჟურნალისტებს განუცხადა, ყველაფერი უნდა გაკეთდეს იმისთვის, რომ საქართველოში მშვიდობა იყოს და ასეთი მსხვერპლი აღარ განმეორდეს.

"ჩვენ დღეს პატივი მივაგეთ კაპრალ რევაზ ალავერდაშვილს, რომელიც გმირულად დაეცა სამშობლოს დასაცავად. მივუსამძიმრე მის მამას, სოფელს და ვუსამძიმრებ სრულიად საქართველოს. ჩვენ ყველაფერი უნდა გავაკეთოთ სამომავლოდ იმისთვის, რომ საქართველოში იყოს მშვიდობა და ასეთი მსხვერპლი აღარ განმეორდეს", - განაცხადა ბიძინა ივანიშვილმა.

კომენტარი გააკეთა ასევე თავდაცვის მინისტრმა ირაკლი ალასანიამაც. მისი განცხადებით, თავდაცვის სამინისტროს მთავარი ამოცანა იქნება მშვიდობის და იმ ქვეყნის დაცვა, რომელსაც თავი შესწირა კაპრალმა ალავერდაშვილმა.

"კაპრალი ალავერდაშვილი არის ჩვენი ქვეყნის გმირი. ის გმირულად იცავდა საქართველოს 2008 წელს, როცა აგრესორებმა შემოუტიეს ჩვენს ქვეყანას. მინდა მივუსამძიმრო სრულიად საქართველოს. ძნელია ოჯახისთვის, თითოეული ჩვენგანისთვის და მთელი საქართველოსთვის. ეს ფაქტი კიდევ ერთხელ შეგვახსენებს იმ ტრაგედიას, რომელიც 2008 წელს დაგვატყდა თავს. მინდა ვისურვო, რომ საქართველოს ცოცხალი გმირები უმრავლოს ღმერთმა. ჩვენი ამოცანა იქნება დავიცვათ მშვიდობა და ის ქვეყანა, რომლის დაცვასაც შესწირა თავი კაპრალმა ალავერდაშვილმა", - განაცხადა ირაკლი ალასანიამ.

იხილეთ ვიდეო: კაპრალი რევაზ ალავერდაშვილი სოფელ ნიჩბისის სასაფლაოზე დაკრძალეს

ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს