ეროვნულ გალერეაში დღეს გამოფენა - "ფიროსმანი 150" გაიხსნება. როგორც "ინტერპრესნიუსს" ეროვნული გალერეიდან აცნობეს, გამოფენა დიდი ქართველი მხატვრის ნიკო ფიროსმანაშვილის დაბადებიდან 150 წლის იუბილეს ეძღვნება.
ექსპოზიციაზე წარმოდგენილი იქნება შალვა ამირანაშვილის სახელობის ხელოვნების მუზეუმის ფონდებში დაცული ნიკო ფიროსმანის 110 ნამუშევარი.
პროექტი "ფიროსმანი 150" გასული საუკუნის 70-იანი წლების შემდეგ ყველაზე ფართომასშტაბიანი გამოფენაა საქართველოს ეროვნულ მუზეუმში არსებული მხატვრის ნამუშევრების კოლექციიდან.
UNESCO-ს გენერალური კონფერენციის 36-ე სესიაზე მიღებული გადაწყვეტილების თანახმად, ნიკო ფიროსმანის დაბადებიდან 150 წლის იუბილე შეტანილია იმ ღონისძიებათა ნუსხაში, რომლის აღნიშვნაშიც 2012-13 წწ. UNESCO მიიღებს მონაწილეობას.
პირველად ფიროსმანის ნამუშევრებს ფართო საზოგადოება 1913 წელს მოსკოვში გამართული ავანგარდისტების გამოფენაზე გაეცნო.
