ვარკეთილში ახალი მედიათეკა აშენდა
თბილისის მერიის ინიციატივით ქალაქში საერთაშორისო სტანდარტების შესაბამისი, თანამედროვე დიზაინის მედიათეკების მშენებლობა მიმდინარეობს.როგორც "ინტერპრესნიუსს" მერიიდან აცნობეს, თითოეული შენობა კომფორტული და განსხვავებულია, როგორც ინფრასტრუქტურით, ასევე შინაარსობრივი დატვირთვითაც.
მედიათეკაში ნებისმიერი ასაკის დაინტერესებული პირი ინტერნეტ-ბიბლიოთეკით, ელექტრონული წიგნებითა და სხვადასხვა სახის ლიტერატურით სარგებლობს.
ახალი მედიათეკა ვარკეთილში აშენდა. თბილისის მერმა გიგი უგულავამ კულტურულ-საგანმანათლებლო ცენტრი დღეს დირექტორთან ერთად გახსნა, დაათვალიერა და მედიათეკაში დანერგილ სიახლეებს გაეცნო.
ახალი მედიათეკა ორშაბათის გარდა ყოველდღე 11:00-დან 20:00 საათამდე იმუშავებს. წლიური აბონემენტის ღირებულება 15 ლარს შეადგენს. აბონემენტის ღირებულებაში წიგნების სახლში გატანა, ელექტროფონდებით სარგებლობა, კითხვის საათი ბავშვებისათვის, კინო-ჩვენებებზე დასწრება, საინტერესო ადამიანებთან შეხვედრები და სხვადასხვა კულტურული ღონისძიებები შედის.
აბონიმენტების მფლობელები დაგეგმილი ღონისძიებების შესახებ მედიათეკის თანამშრომლების მიერ წინასწარ იქნებიან გაფრთხილებულები. პენსიონრები, სოციალურად დაუცველი და მრავალშვილიანი ოჯახის წევრები, მედიათეკის სერვისებით უფასოდ ისარგებლებენ.
მერიის ინფორმაციით, მედიათეკების მშენებლობა ქალაქში გრძელდება და უახლოეს მომავალში თბილისს კიდევ რამოდენიმე ახალი ობიექტი შეემატება.
v-if="article.gallery" v-html="article.gallery"
