საგადასახადო ვალდებულების მოთხოვნის ხანდაზმულობის ვადა 2017 წლისთვის განახევრდება
გადასახადის გადამხდელისთვის გადასახადის დარიცხვის, საგადასახადო მოთხოვნის წარდგენის ხანდაზმულობის ვადა 6 წლიდან 3 წლამდე მცირდება და შემცირება ეტაპობრივად განხორციელდება.
საგადასახადო ვალდებულების ხანდაზმულობის ვადის განახევრებას "საგადასახადო კოდექსში" დაგეგმილი ცვლილებები ითვალისწინებს, რომელიც ფინანსთა სამინისტრომ პარლამენტს უკვე წარუდგინა.
ცვლილებების პროექტის თანახმად, საგადასახადო მოთხოვნის ხანდაზმულობის ვადა 2015 წლის 1 იანვრამდე კვლავ 6 წლით იქნება განსაზღვრული, 2015 წლის 1 იანვრიდან 2016 წლის 1 იანვრამდე 5 წლის ვადით განისაზღვრება, 2016 წლის 1 იანვრიდან 2017 წლის 1 იანვრამდე - 4 წლით, ხოლო 2017 წლიდან - 3 წლით.
ამავე ცვლილებებში ზუსტდება "საგადასახადო კოდექსის" რიგი დებულებები და უქმდება ნორმა, რომელიც ფინანსთა მინისტრს შესაძლებლობას აძლევს, კოდექსის ცალკეული ნორმები თავად განმარტოს, გამოსცეს ინსტრუქციები და ის შეხედულებისამებრ მთავრობას შეუთანხმოს.
v-if="article.gallery" v-html="article.gallery"
