53-ე საჯარო სკოლაში სასწავლო პროცესი აღდგენილია. როგორც "ინტერპრესნიუსს" 53-ე სკოლის დირექტორის მოადგილემ შორენა გამყრელიძემ განუცხადა , გაფიცულმა პედაგოგებმა მოსწავლეების ინტერესებიდან გამომდინარე გადაწყვიტეს, რომ სასწავლო პროცესი აღდგენილიყო. დღეიდან უფლებამოსილების შესრულებას დაიწყებს 53-ე სკოლის დირექტორი ეკა გახარია. ეკა გახარია მოსწავლეებს, გაკვეთილებზე დასწრებისაკენ მოუწოდებს.

"რაც ყველაზე მეტად მაღელვებს, ეს არის ის, რომ როგორც გავიგე, მოსწავლეებს აქვთ უხერხულობის განცდა, კარგად რომ არ დამხვდნენ. ძალიან მინდა ვთხოვო ყველას, ყველა მედიასაშუალებით, რომ შემოვიდნენ, გააგრძელონ სასწავლო პროცესი, რომ მათ არ შეექმნათ პრობლემები. მე მათ დასახმარებლად ვარ მოსული და არა პირიქით", - განაცხადა ეკა გახარიამ.

მას დღეს სკოლის პედაგოგებთან შეხვედრა ექნება.

53-ე სკოლის მასწავლებლების და მოსწვალეების საპროტესტო აქციები დასრულებულია. რამდენიმე დღის განმავლობაში მასწავლებლები და მოსწავლეები 53-ე სკოლის ყოფილი დირექტორის, მარიამ რამინაშვილის თანამდებობაზე აღდგენის მოთხოვნით სკოლის ეზოში საპროტესტო აქციებს მართავდნენ.