გურამ გირგვლიანი - ირინა ენუქიძე და სანდრო გირგვლიანი განაჩენს ელოდებიან
სანდრო გირგვლიანის საქმეზე განაჩენს ირინა ენუქიძე და სანდრო გირგვლიანი ელოდებიან, - ამის შესახებ საქალაქო სასამართლოში მისულმა სანდრო გირგვლიანის მამამ, გურამ გირგვლიანმა განაცხადა.
როგორც მან აღნიშნა, იმედი აქვს, რომ ამ საქმეზე არსებულ შეკითხვებს პასუხები გაეცემა.
"ამდენი წელი ველოდებოდი ამას, იმიტომ, რომ ვიცოდი, როდესაც ხელისუფლება შეიცვლებოდა, მოხდებოდა ამ კითხვებზე პასუხების გაცემა. პასუხი უნდა გაეცეს სტრასბურგის გადაწყვეტილებას. თვითონ სახელმწიფომ უნდა უპასუხოს იმ დარჩენილ კითხვებს, რომელიც არსებობდა. ამას ელოდება საზოგადოება და ალბათ, პირველ რიგში ჩემი ცხონებული მეუღლე და შვილი სანდრო. ეს მათი ბრძოლა იყო და იმედი მაქვს იქ მაინც გაიხარებენ", - აღნიშნა გურამ გირგვლიანმა სასამართლო პროცესის დაწყებამდე.
სანდრო გირგვლიანის საქმეზე საქალაქო სასამართლოში საქმის არსებითი განხილვა უნდა გაიმართოს. როგორც პროკურორმა ირაკლი ნადარეიშვილმა განაცხადა, დღეს მხარეებმა შესავალი სიტყვები უნდა თქვან. ამასთან, უნდა მოხდეს ტექნიკური დეტალების დაზუსტება.
v-if="article.gallery" v-html="article.gallery"
