შინაგან საქმეთა სამინისტროს განცხადებით, სამტრედია-აბაშის გზაზე მომხდარ ავტოავარიასთან დაკავშირებით, გამოძიება მიმდინარეობს. წუხელ, სამტრედია-აბაშის გზაზე, დევნილთა მინისტრ სოზარ სუბარის ავტომობილი და ტაქსი ერთმანეთს შეეჯახა.
როგორც "ინტერპრესნიუსს" შინაგან საქმეთა სამინისტროში განუცხადეს, გამოძიება 276-ე მუხლის მე-5 ნაწილით მიმდინარეობს, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც ადამიანის სიცოცხლის მოსპობა გამოიწვია.
"ინტერპრესნიუსს" დევნილთა სამინისტროში განუცხადეს, რომ შემთხვევის შედეგად მინისტრი და მისი მძღოლი არ დაშავებულან, თუმცა ავარიის შედეგად მეორე ავტომობილის მძღოლი გარდაიცვალა.
