ამერიკის შეერთებული შტატების საერთაშორისო განვითარების სააგენტოს (USAID) მისიის დირექტორი, დუგლას ბოლი და საქართველოს ფინანსთა მინისტრის მოადგილე, შემოსავლების სამსახურის უფროსი, გიორგი თაბუაშვილი დღეს ერთიანი სახაზინო კოდების რეფორმის პრეზენტაციას გამართავენ.
როგორც "ინტერპრესნიუსს" USAID-იდან აცნობეს, ბიზნესის, სამოქალაქო საზოგადოების, მთავრობის და დიპლომატიური წრეების ასზე მეტი წარმომადგენელი გადასახადების გამარტივების მიმართულებით მთავრობის მიღწევებს გაეცნობა. ერთიანი სახაზინო კოდების რეფორმის შედეგად, რომელსაც თავიდანვე დიდ დახმარებას უწევდა UშAID-ი, 125 სახაზინო კოდი 1 კოდში გაერთიანდა.
"ამ ინიციატივის წყალობით მნიშვნელოვნად შემცირდება საგადასახადო ტრანზაქციების რაოდენობა, რაც შესაბამისად, ნაკლებ დროს და რესურსს მოითხოვს გადამხდელისგან. გადასახადების ადმინისტრირების გამარტივება ხელს შეუწყობს კერძო სექტორის განვითარებას საქართველოში", - ნათქვამია განცხადებაში.
პრეზენტაციაზე, ასევე, მოხდება ვიდეორგოლის ჩვენება, რომელიც რეფორმას დეტალურად აღწერს. ჩვენების შემდეგ ფინანსთა სამინისტროს და შემოსავლების სამსახურის თანამშრომლების დაჯილდოება გაიმართება, რომელთაც რეფორმის წარმატებით განხორციელებაში დიდი წვლილი შეიტანეს.
