თბილისის სააპელაციო სასამართლოსთან დღეს ე.წ. კორტების სპეცოპერაციის საქმეზე მსჯავრდებულების ოჯახის წევრები და ახლობლები საპროტესტო აქციას გამართავენ.
როგორც "ინტერპრესნიუსს" მსჯავრდებულების ახლობლებმა აცნობეს, აქცია 15:00 საათზე დაიწყება. დღესვე სააპელაციო სასამართლო ირაკლი ფირცხალავას, გიორგი ცააძისა და სხვა მსჯავრდებულების სააპელაციო საჩივრის განხილვას იწყებს. სხდომა 15:30 საათზეა ჩანიშნული.
დაცვის მხარესთან ერთად საქალაქო სასამართლოს განაჩენი გამამართლებელ ნაწილში გასაჩივრებული აქვს პროკურატურასაც.
ე.წ. კორტების სპეცოპერაციის საქმეზე თბილისის საქალაქო სასამართლომ განაჩენი 30 ოქტომბერს გამოაცხადა. მოსამართლე ბადრი კოჭლამაზაშვილის გადაწყვეტილებით, ირაკლი ფირცხალავა და გიორგი ცააძე განზრახ მკვლელობის ბრალდებაში გამტყუნდნენ.