ბიზნესმენ ბესიკ ხარძიანის მკვლელობის საქმეზე ბრალდების მხარე მოსამართლე ლელა ნოზაძის აცილების შუამდგომლობას დააყენებს.

როგორც დღევანდელი პროცესის დაწყებამდე საქმის ერთ-ერთმა პროკურორმა ამირან გულუაშვილმა განაცხადა, აღნიშნული შუამდგომლობით სასამართლოს პროკურატურა დღეს მიმართავს. პროკურორის განმარტებით, აცილების საფუძვლად ბრალდების მხარე დააყენებს იმ გარემოებას, რომ 2011 წელს პატიმრობა ნარკოდანაშაულის ბრალდებაზე ბესიკ ხარძიანს სწორედ აღნიშნულმა მოსამართლემ შეუფარდა.

რაც შეეხება მკვლელობის მოტივს, ჟურნალისტების შეკითხვის საპასუხოდ არის თუ არა მოტივის მიმართულებით რაიმე სიახლე ცნობილი პროკურატურისთვის, ამირან გულუაშვილმა განმარტა, რომ მკვლელობის მოტივის დადგენის მიზნით გამოძიება გრძელდება და გამოძიების შედეგებზე საზოგადოება დროულად იქნება ინფორმირებული.

პროცესის დაწყებამდე კომენტარი გააკეთა ბესიკ ხარძიანის ოჯახის ადვოკატმა მალხაზ თალაკვაძემაც, რომელმაც აღნიშნა, რომ კონკრეტულ მოტივზე ამ ეტაპზე ვერ ისაუბრებს. ჟურნალისტების შეკითხვაზე ფიგურირებენ თუ არა ოჯახის პოზიციაში მკვლელობის მონაწილეებად კვლავ ქურასბედიანი და უდესიანი, ადვოკატმა განმარტა, რომ ყველა ვერსიას აქვს არსებობის უფლება, თუმცა გამოძიების შედეგებს დაელოდება.