ფესტივალი „თბილისი - 2016 თანამედროვე მუსიკის საღამოები“ მიმდინარეობს

კულტურისა და ძეგლთა დაცვის სამინისტროს თბილისის მერიის კულტურული ღონისძიებების ცენტრისა და “თიბისი ბანკის” მხარდაჭერით, 26 მარტიდან 9 მაისის ჩათვლით, ფესტივალი „თბილისი - 2016 თანამედროვე მუსიკის საღამოები“ მიმდინარეობს.

როგორც ”ინტერპრესნიუსს” კულტურისა და ძეგლთა დაცვის სამინისტროდან აცნობეს, ფესტივალში მონაწილეობენ ჩრდილების სახელმწიფო თეატრი „ბუდრუგანა გაგრა“, კონსერვატორიის სტუდენტები, კურსდამთავრებულები და უცხოელი მუსიკოსები.

დღეს 19:00 საათზე პარლამენტის ეროვნულ ბიბლიოთეკაში ანსამბლი „მეითარ &Tedarim; Project“ (ისრაელი) გამართავს დასკვნით კონცერტს „გადარჩენილი ვარშავიდან“. ღონისძიება ჰოლოკოსტის მსხვერპლს ეძღვნება.

”ფესტივალი ყოველწლიურად მასპინძლობს თანამედროვე მუსიკის ექსპერტ-შემსრულებლებს და გამოჩენილ კომპოზიტორებს მსოფლიოს სხვადასხვა ქვეყნიდან. „თანამედროვე მუსიკის საღამოებში“ მონაწილეობდნენ ისეთი ცნობილი ანსამბლები, როგორიცაა ფრაიბურგის ანსამბლი „Recherche“, პარიზის ანსამბლი „Court-Circuit“, ისრაელის ანსამბლები „Contemporary Music Players“ და „Meitar“; კომპოზიტორები: იზაბელ მუნდრი (გერმანია), ფილიპ იურელი (საფრანგეთი), ჰანს ტუჩკუ (გერმანია), დან იუხასი (ისრაელი), საფრანგეთის უკვდავთა აკადემიის წევრი ფრანსუა-ბერნარ მაში (საფრანგეთი), ისრაელში მოღვაწე კომპოზიტორი იოსებ ბარდანაშვილი; შემსრულებლები საფრანგეთიდან, შვეიცარიიდან, გერმანიიდან, ისრაელიდან, ლიტვიდან და სხვა ქვეყნებიდან”, - ნათქვამია განცხადებაში.