„საქართველოს მელიორაცია“ საინფორმაციო კამპანიას ატარებს
სოფლის მეურნეობის სამინისტროს შპს „საქართველოს მელიორაცია“ ირიგაციის თანამედროვე მეთოდების გავრცელების ხელშეწყობის მიზნით, საინფორმაციო კამპანიას ატარებს.
როგორც ”ინტერპრესნიუსს” უწყებიდან აცნობეს, მორიგი შეხვედრა საგარეჯოს მუნიციპალიტეტის სოფელ ხაშმში გაიმართა.
მათივე ინფორმაციით, კომპანიის წარმომადგენლებმა ადგილობრივ ფერმერებს წვეთური და დაწვიმებითი ირიგაციის მეთოდების შესახებ დეტალური პრეზენტაცია წარუდგინეს და მის უპირატესობაზე მიაწოდეს ინფორმაცია.
”ირიგაციის ეს მეთოდი მორწყვის ტრადიციულ, მიგდებით მორწყვის წესზე ბევრად მომგებიანია, ვინაიდან ელექტროენერგიის, წყლის და სასუქის ორჯერ ნაკლებ რესურსს საჭიროებს და მნიშვნელოვნად ზრდის მოსავლიანობას. მსგავსი ტიპის შეხვედრები წყალმომხმარებლებთან მთელი ქვეყნის მასშტაბით ტარდება”, - განმარტავენ უწყებაში.
შეხვედრას შპს „საქართველოს მელიორაციის“ გენერალური დირექტორი ლევან დვალი, შპს „საქართველოს მელიორაციის“ კახეთის რეგიონის დირექტორი ნიკოლოზ ქურთიშვილი და ადგილობრივი მოსახლეობა დაესწრნენ.
v-if="article.gallery" v-html="article.gallery"
