კომპანია „თელასი“ აბონენტებს მოუწოდებს, სერვისის გაუმჯობესების მიზნით საკუთარი მობილური ტელეფონის ნომრები მიაწოდონ

მომხმარებელთა მომსახურების გასაუმჯობესებლად კომპანია „თელასი“ აბონენტებს მოუწოდებს, მაქსიმალურად ითანამშრომლონ მათთან და მიაწოდონ საკუთარი მობილური ტელეფონის ნომრები, - ამის შესახებ დღეს კომპანია „თელასში“ გამართულ პრესკონფერენციაზე კომპანიის კომერციული დირექტორის მოადგილე მიხა ანთაძემ განაცხადა.

როგორც მიხა ანთაძემ პრესკონფერენციაზე განაცხადა, კომპანია „თელასი“ მომხმარებლებს ენერგეტიკისა და წყალმომარაგების მარეგულირებელი კომპანიის მიერ დადგენილი სტანდარტებით მომსახურება. კომისიის 2016 წლის 25 ივნისის # 13 დადგენილების შესაბამისად, დაინერგა ე.წ. ელექტრონული ჟურნალები, რომლებიც საშუალებას მისცემს მათ, პრაქტიკულად ონლაინრეჟიმში აღრიცხონ ყველა მომსახურება და მომსახურების ვადები.

მიხა ანთაძის თქმით, ეს სერვისებია ახალ აბონენტად რეგისტრაცია და გამანაწილებელ ქსელზე მიერთება, ტექნიკური მომსახურება, დავალიანების, ელექტროენერგიის გეგმური ან ავარიული გამორთვების შესახებ ინფორმაციის მიწოდება.

„კომპანია გეგმავს, კიდევ უფრო ახლოს მივიდეს მომხმარებელთან და შეამციროს ის დისტანცია, რომელიც ბუნებრივად არსებობს კომპანიასა და აბონენტებს შორის. ამით ჩვენ ვცდილობთ მაქსიმალურად სრულყოფილი გავხადოთ ჩვენი მონაცემთა ბაზები, დაახლოებით ერთი წელია ვმუშაობთ ამ კუთხით, მაგრამ რჩება აბონენტების ნაწილი, რომელთა სატელეფონო ნომრები ჩვენს ბაზაში ასახული არ არის და გვინდა მოვუწოდოთ თბილისის მოსახლეობას, მაქსიმალურად ითანამშრომლონ ჩვენთან, გაგვიზიარონ საკუთარი მობილურების ნომრები, რაც საშუალებას მოგვცემს, მივაწოდოთ ინფორმაცია, ყველა იმ მომსახურების სერვისის შესახებ, რომელსაც ჩვენ ვახორციელებთ. საბოლოო ჯამში ჩვენ გვინდა ქვითრის დარიგების სისტემიდან ამ სისტემაზე გადავიდეთ, რაც აბონენტისთვისაც ხელსაყრელია და კომპანიისთვისაც ნაკლები დანახარჯია“, - განაცხადა მიხა ანთაძემ.

მიხა ანთაძის თქმით, ტელეფონების ნომრები აბონენტებს შეუძლიათ მიაწოდონ კომპანიის თანამშრომლებს, ასევე თელასის ვებგვერდზე ე.წ. აბონენტის კაბინეტში შევიდნენ და იქ დააფიქსირონ თავიანთი ნომრები ან დარეკონ ცხელ ხაზზე.

როგორც „თელასში“ აცხადებენ, სმს შეტყობინების სერვისით, უკვე 300 000-ზე მეტი აბონენტი სარგებლობს. სულ კომპანია „თელასს“ 520 ათასი აბონენტი ჰყავს.