ფიქრია ჩიხრაძე - საჯარო პირები ვალდებული ვართ საზოგადოებაში მოჭარბებული აგრესიის შემცირებას შევუწყოთ ხელი
პრეზიდენტის მრჩევლის პოლიტიკურ საკითხებში, ფიქრია ჩიხრაძის განცხადებით, ყველა საჯარო პირმა ხელი უნდა შეუწყოს ბოლო პერიოდში საზოგადოებაში მოჭარბებული აგრესიის შემცირებას. ამის შესახებ ჩიხრაძემ, პრემიერ-მინისტრსა და ნიკა მელიას შორის გუშინ მომხდარ ინციდენტზე დასმული კითხვის საპასუხოდ განაცხადა. როგორც ფიქრია ჩიხრაძემ აღნიშნა, ამ ფაქტით საზოგადოება შეწუხებულია.
"ჩვენ ყველანი შეწუხებული ვართ ამ ფაქტით. ერთი რამ, რაც მინდა ვთქვა და რაზედაც განსაკუთრებით ბოლო პერიოდში ჩვენ ვლაპარაკობთ, ეს არის ქართულ საზოგადოებაში მოჭარბებული აგრესია. ყველა ის ადამიანი, ვისაც შეხება გვაქვს მეტ-ნაკლებად საჯარო სივრცესთან, ვალდებული ვართ, რომ ეს გავითვალისწინოთ, ამას ანგარიში გავუწიოთ და პირიქით, ვიზრუნოთ და ნაბიჯები გადავდგათ იმისკენ, რომ იყოს საგნობრივი დიალოგი და მოვიქცეთ ისე, რომ ამ აგრესიის შემცირებას შევუწყოთ ხელი. ეს პასუხისმგებლობა გააჩნია თითოეულ საჯარო პირს", - განაცხადა ფიქრია ჩიხრაძემ.
v-if="article.gallery" v-html="article.gallery"
