სააკაშვილის სახაზინო ადვოკატი საქმეზე სასამართლო სხდომის გადადებას ითხოვს

მიხეილ სააკაშვილის სახაზინო ადვოკატი სანდრო გირგვლიანის საქმეზე სასამართლო სხდომის გადადებას ითხოვს. აღნიშნული შუამდგომლობით სოფო გოგლიჩიძემ მოსამართლე გიორგი არევაძეს სასამართლო სხდომაზე შუამდგომლობით მიმართა.

მისი განმარტებით, საქმის მასალების გაცნობა დროის სიმცირის გამო ვერ მოახერხა. ამასთან, ადვოკატის თქმით, საქმის სირთულიდან და მოცულობიდან გამომდინარე, ის მოითხოვს სასამართლო გონივრული ვადით გადაიდოს. ადვოკატმა აღნიშნა, რომ ის 26 დეკემბრიდან 29 დეკემბრის ჩათვლით შვებულებაში გადის.

მოსამართლე დაინტერესდა, რას უწოდებს ადვოკატი საქმის სირთულეს. ადვოკატმა განმარტა, რომ არ შეეზღუდა მოსამართლეს მისთვის მინიჭებული უფლება და სხდომა გადაედო. რაც შეეხება შვებულებას, ადვოკატის თქმით, შვებულების განცხადებაზე ნებართვა 21 დეკემბერსაა გაცემული.