ადვოკატი პანკისის ხეობაში სპეცოპერაციის შედეგად დაკავებული ზურაბ გორნაკაშვილის გირაოს სანაცვლოდ გათავისუფლებას მოითხოვს

ადვოკატი პანკისის ხეობაში ჩატარებული სპეცოპერაციის შედეგად დაკავებული ზურაბ გორნაკაშვილის გირაოს სანაცვლოდ გათავისუფლებას მოითხოვს. ტერორიზმის დაფინანსებაში, ტერორისტული საქმიანობის სხვაგვარი მატერიალური მხარდაჭერასა ან რესურსით უზრუნველყოფაში ბრალდებულის ადვოკატის, ირაკლი ბენიას განცხადებით, საქმეში არსებული მტკიცებულებები არ იძლევა იმის საფუძველს, რომ მისი დაცვის ქვეშ მყოფი მონაწილეობდა დანაშაულებრივი ქმედების ჩადენაში. ამასთან, ბენიას არ დაუკონკრეტებია, თუ რა თანხას შესთავაზებს სასამართლოს, გორნაკაშვილის გირაოთი გათავისუფლებისთვის.

"პროკურატურა, სავარაუდოდ, პატიმრობას მოითხოვს, დაცვის მხარეს კი გვექნება შუამდგომლობა, რომ მას აღკვეთის ღონისძიების სახით გირაო შეეფარდოს. კონკრეტულ მტკიცებულებებზე ვერ ვისაუბრებ. საქმის მასალებში არსებობს სხვადასხვა სახის მტკიცებულებები. თუმცა, დაცვის მხარე თვლის, რომ მტკიცებულებები არ იძლევა საფუძველს, რომ ჩემი დაცვის ქვეშ მყოფი მონაწილეობდა ამ დანაშაულებრივი ქმედების ჩადენაში", - განაცხადა ბენიამ.

ადვოკატის თქმით, ის, რომ გორნაკაშვილის საქმე ცალკე წარმოებადაა გამოყოფილი და მისი დაცვის ქვეშ მყოფს ჩვენება აქვს მიცემული, არ ნიშნავს, რომ გორნაკაშვილი გამოძიებასთან თანამშრომლობს.

"ეს არ ნიშნავს იმას, რომ თანამშრომლობს გამოძიებასთან. პროკურატურას აქვს უფლება ცალ-ცალკე შეიტანოს საქმეები. ჩემი დაცვის ქვეშ მყოფი რამდენჯერმეა დაკითხული ამ საქმეზე, მათ შორის დაკავებამდეც. ასევე დაიკითხა დაკავების შემდეგაც, თუმცა კონკრეტულ დეტალებზე ვერ ვისაუბრებ", - განაცხადა ბენიამ.

ლადო პაპავა - საქართველოში სტაბილურად არასტაბილური ვითარება მხოლოდ რუსეთის ინტერესებშია
ქართული პრესის მიმოხილვა 24.02.2020
ვიქტორ ყიფიანი - ევროკავშირი საქართველოს  რეგიონში მთავარ პარტნიორად მიიჩნევს და აღნიშნავს, რომ საქართველო სრულადაა ჩართული „აღმოსავლეთ პარტნიორობის“  მრავალმხრიან  არქიტექტურაში
როგორ დავაჩქაროთ მდგრადი განვითარების მიზნების განხორციელება აზიასა და წყნარ ოკეანეთში