ადვოკატი - ექსპერტიზის დასრულების შემდეგ თემირლან მაჩალიკაშვილს სახლში დღესვე გადაასვენებენ
ექსპერტიზის დასრულების შემდეგ თემირლან მაჩალიკაშვილს სახლში დღესვე გადაასვენებენ, - ამის შესახებ მაჩალიკაშვილების ოჯახის ადვოკატმა მარიამ კუბლაშვილმა ლევან სამხარაულის სახელობის სასამართლო ექსპერტიზის ეროვნულ ბიუროსთან ჟურნალისტებთან საუბრისას განაცხადა.
სამხარაულის ექსპერტიზის ეროვნულ ბიუროში თემირლან მაჩალიკაშვილის ახლობლები, მისი ოჯახის წევრები და იურისტი იმყოფება. მარიამ კუბლაშვილის განმარტებით, ოჯახი ბრძოლის გაგრძელებას აპირებს.
„თემირლან მაჩალიკაშვილის მდგომარეობა დილის 6 საათზე გაუარესდა. როგორც მედიკოსებმა მე მითხრეს, ეს გარკვეულწილად პროგნოზირებადი იყო, თუმცა ჩვენ მრავალი კითხვა გვაქვს, თუ რატომ დადგა სიკვდილი, როდესაც ჩვენ მის წაყვანას უცხოეთში ვაპირებდით და ა.შ. რაც შეეხება თავად თემირლან მაჩალიკაშვილს, მისი გადასვენება საკუთარ სახლში დღესვე, ექსპერტიზის დასრულების შემდეგ მოხდება“, - განაცხადა მარიამ კუბლაშვილმა.
v-if="article.gallery" v-html="article.gallery"
