სამართალდამცავი ორგანოების მიმართ ჩემი მხრიდან არანაირი მაპროვოცირებელი ქმედება არ ყოფილა, - ამის შესახებ მეტროს სადგურ „თავისუფლების მოედანზე“ ადმინისტრაციული წესით დაკავებულმა გიორგი სილაგაძემ თბილისის საქალაქო სასამართლოში სხდომის დასრულების შემდეგ ჟურნალისტებთან საუბრისას განაცხადა.
გიორგი სილაგაძემ გაიხსენა ის შემთხვევა, თუ როგორ ჩამოდიოდა ესკალატორზე, თუმცა, აღნიშნა, რომ მისთვის გაუგებარია მისი დაკავების მოტივი. „მე თავს მართლად მივიჩნევ, სასამართლოში ყველა კითხვაზე პასუხი იქნება გაცემული, როდესაც იქნება აუდიო და ვიდეომასალების განხილვა. ყველა ფაქტი მეტყველებს, თუ რამხელა უკანონობას შევეწინააღმდეგე. მეტროში დავინახე მარჯვენა მხარეს ჩოჩქოლი, გავამახვილე ყურადღება რამდენიმე წამით, თუმცა გავაგრძელე ჩემი გზა. ჩემგან არანაირი გამოწვევა და ჟესტიკულაცია არ ყოფილა“, - განაცხადა გიორგი სილაგაძემ.
შს მინისტრის მოადგილე ნათია მეზვრიშვილის ინფორმაციით, 2018 წლის 28 იანვარს, მეტროს სადგურ „თავისუფლების მოედანთან“ შეკრებილ ახალგაზრდებს შორის მოხდა კონფლიქტი. საპატრულო ეკიპაჟის მისვლისას კონფლიქტში მონაწილე რამდენიმე ახალგაზრდა გაიქცა მეტროპოლიტენის მიმართულებით. პატრულ-ინსპექტორებმა შეაჩერეს ისინი იდენტიფიცირების მიზნით. „ამ დროს, როდესაც პოლიცია ასრულებდა მათზე კანონით დაკისრებულ მოვალეობას და ახდენდა ახალგაზრდების იდენტიფიცირებას, საპირისპირო მხარეს მოძრავი ესკალატორიდან ორი პირი: 1992 და 1982 წელს დაბადებული პირები, რომლებსაც არანაირი კავშირი ახალგაზრდების შეჩერების პროცესთან არ ჰქონიათ, გამოესარჩლნენ პოლიციის მიერ კანონიერად შეჩერებულ ახალგაზრდებს, გააპროტესტეს პოლიციელთა კანონიერი ქმედებები, საპატრულო პოლიციის თანამშრომლების მიმართ გამოიჩინეს აგრესია, გადააფურთხეს და მიაყენეს სიტყვიერი შეურაცხყოფა. საზოგადოებას შევახსენებთ, რომ პოლიციელის შეურაცხყოფა და მის მიმართ აგრესია ისჯება კანონით, განსაკუთრებით მაშინ, როცა პოლიციელი ასრულებს მის მოვალეობას. შესაბამისად, პოლიციელებმა შეასრულეს კანონის მოთხოვნა აღნიშნულ შემთხვევაშიც და დაიწყეს ამ პირების ადმინისტრაციული წესით დაკავება. დაკავების პროცესში აღნიშნულმა პირებმა წინააღმდეგობა გაუწიეს საპატრულო პოლიციის თანამშრომლებს და განაგრძეს შეურაცხყოფის მიყენება. სწორედ დაკავების მხოლოდ ეს ფაქტია ასახული მოქალაქის მიერ სოციალურ ქსელში გავრცელებულ ვიდეოში. ჩვენი მხრიდან სასამართლოში წარვადგენთ მთლიანი ინციდენტის ამსახველ კადრებს“, - განაცხადა მეზვრიშვილმა.