ზვიად დევდარიანი მიმართავს შინაგან საქმეთა სამინისტროს და მზაობას გამოთქვამს, მოხდეს მასთან გასაუბრება და სამართლებრივი პროცედურების განხორციელება, - ამის შესახებ „სიდას“ ყოფილი ხელმძღვანელის ზვიად დევდარიანის ადვოკატმა დიმიტრი გაბუნიამ დღეს გამართულ პრესკონფერენციაზე განაცხადა.

ადვოკატის განცხადებით, არც ერთი ნაბიჯი, რომელიც ზვიად დევდარიანის მიმართ ბოლო პერიოდის განმავლობაში განხორციელდა, რეაგირების გარეშე არ დარჩება. ამასთან, ადვოკატი აპირებს ზვიად დევდარიანის პატივისა და ღირსების შელახვის ფაქტზე სასამართლოს მიმართოს.

„მივმართავ შსს-ს, რომელმაც ადევნების ფაქტზე დაიწყო ძიება, მიგვიწვიოს. ჩვენ მზად ვართ გასაუბრებისთვის, ნებისმიერი სამართლებრივი პროცედურისთვის, რათა პოზიცია დავასაბუთოთ. ამასთან, ათ დღეზე მეტია, ფაქტზე ძიებაა დაწყებული. თუმცა შინაგან საქმეთა სამინისტროს მოწოდების მიუხედავად, არავის მიუმართავს ე.წ. შელახული უფლებების დაცვის მოთხოვნით. თუ ისინი არ მიდიან, ჩვენ ვამხელთ დროის მოკლე მონაკვეთში ამ პირებს, რომელთაც ანგაჟირების შედეგად გააკეთეს ესა თუ ის განცხადება. ჩვენ ასევე ვაპირებთ სამოქალაქო სარჩელი შევიტანოთ ზვიად დევდარიანის და ზოგადად ამ ოჯახის პატივის, ღირსებისა და საქმიანი რეპუტაციის შელახვის მოთხოვნით. მოპასუხეები კონკრეტული პირები იქნებიან ”, - განაცხადა დიმიტრი გაბუნიამ.

ადოკატის თქმით, თუ ვინ არიან ეს პირები, მას აქვს ინფორმაცია, თუმცა ამ ეტაპზე გასაჯაროებისგან თავს შეიკავებს.

გაბუნიას განცხადებით, ისინი მოითხოვენ ასევე დაიწყოს ძიება მათ მიმართ, ვინც შელახა ზვიად დევდარიანის უფლებები, კერძოდ, დაარღვია პირადი მიმოწერის საიდუმლოება და გადასცა მესამე პირს პირადი მიმოწერა, რათა მომხდარიყო ზვიად დევდარიანის დისკრედიტაცია.