ოზურგეთის საკრებულოში "ერთიანი ნაციონალური მოძრაობის" წევრის დავით მჟავანაძის განცხადებით, ხვალ ოზურგეთის მერიისა და პოლიციის შენობებთან საპროტესტო აქციები გაიმართება.

როგორც დავით მჟავანაძემ "ინტერპრესნიუსთან" საუბრისას განაცხადა, აქციის მონაწილეები საკრებულოს წევრ ბესო ქათამაძეზე განხორციელებულ ძალადობას გააპროტესტებენ.

"ჩვენ ვამბობთ, რომ ჯგუფური, ორგანიზებული დანაშაული მოხდა. ამ ყველაფრის უკან ოზურგეთის გუბერნატორი და მაღალი თანამდებობის პირები დგანან. იმ ადამიანებს, რომლებიც ბესო ქათამაძეს თავს დაესხნენ, ყველაფერი წინასწარ ჰქონდათ დაგეგმილი. ამ პირებმა რამდენიმე დღის წინაც სცადეს ბესო ქათამაძეზე თავდასხმა, თუმცა არ გამოუვიდათ. მოვითხოვთ მუხლის გადაკვალიფიცირებას. თავდამსხმელებმა საკრებულოს მანდატები უნდა დატოვონ. ეს დეპუტატისთვის შეუფერებელი და უღირსი საქციელია. ხვალ, 10:00 საათზე ოზურგეთის მერიასთან ვიკრიბებით და პოლიციის შენობისკენ მსვლელობას მოვაწყობთ",- განაცხადა დავით მჟავანაძემ.

"ნაციონალური მოძრაობის" განცხადებით, ორი დღის წინ მათი პარტიის წევრს ბესიკ ქათამაძეს „ქართული ოცნების" წევრები ფიზიკურად გაუსწორდნენ.

მომხდარ ფაქტზე, ოზურგეთის რაიონულმა სასამართლომ "ქართული ოცნების" წევრს ტარიელ აროშიძეს აღკვეთის ღონისძიების სახით 5000-ლარიანი გირაო შეუფარდა.