ფრანგმა პილოტებმა ავიატური საქართველოში ბათუმიდან დაიწყეს

დღეს ბათუმის საერთაშორისო აეროპორტში 18 ფრანგი პილოტი საკუთარი ვერტმფრენით დაეშვა. როგორც „ინტერპრესნიუსს“ აჭარის მთავრობიდან აცნობეს, პილოტები საქართველოში საკუთარი თვითმფრინავებით ,,საფრანგეთი-საქართველოს“ ავიატურის ფარგლებში ჩამოფრინდნენ. ბათუმში სტუმრად მყოფი ევროპელი პილოტები თანმხლებ პირებთან ერთად ქალაქის ღირშესანიშანობებს გაეცნობიან.

ავიაკომპანია Service Air-ის და ფრანგი პილოტის მიშელ კოლინოს ორგანიზებით, საქართველოში დაგეგმილი ავიატური „Rallye Aero France 2018“ ბათუმიდან დაიწყო და საქართველოს სხვადასხვა ქალაქში გაგრძელდება. მსგავს ავიატურებს კომპანია უკვე 25 წელია აწყობს და საქართველოში ეს მათი პირველი ვიზიტია.

უცხოელ პილოტებს აჭარის მთავრობის თავმჯდომარე ზურაბ პატარაძე შეხვდა და საქართველოს, კერძოს ტურისტულად ერთ-ერთი ყველაზე მიმზიდველი რეგიონის, აჭარის შესახებ მიაწოდა ინფორმაცია.

24 ივნისს თვითმფრინავები ბათუმიდან ნატახტარის აეროდრომზე გადაფრინდებიან, საიდანაც ტურისტული კომპანია Vanilla Sky-ის მიერ დაგეგმილი ტურის მიხედვით მოგზაურობას გააგრძელებენ თბილისში, თელავში, მესტიასა და ქუთაისში. ავიატურს მხარდაჭერა გამოუცხადეს აჭარის მთავრობის ხელმძღვანელობამ, საქართველოს ტურიზმის ეროვნულმა ადმინისტრაციამ, საქართველოს სამოქალაქო ავიაციის სააგენტომ და საქართველოს ნავიგაციის დეპარტამენტმა.

„საქართველოს ტურისტულ ბაზარზე მსგავსი ავიატურების მასპინძლობა ახალი ტურისტული მიმართულების დამკვიდრებას შეუწყობს ხელს და მომავალში საკუთარი თვითმფრინავების მქონე კიდევ უფრო მეტ უცხოელ პილოტს მოიზიდავს ჩვენს ქვეყანაში. ეს კიდევ ერთხელ ადასტურებს საქართველოს მიმართ გაზრდილ ინტერესს,“ - აღნიშნა ზურაბ პატარაძემ ინტერვიუში.

დავით უსუფაშვილი - ახლა ივანიშვილის შუის გაკრეფის კონცეფცია ეხება ყველას, ვინც მის ორბიტაზე არაა, გასაკრეფია, რადგან სახიფათო და პრობლემურია
ქართული პრესის მიმოხილვა 24.08.2019
ვალერი სოლოვეი - კრემლის ქმედებების მოაზროვნე გამმართლებლები, ვინც საქართველოს საქმეებში ჩახედულია, თვლიან, რომ რუსეთს აღარ შეუძლია საქართველოს  პოლიტიკაზე გავლენის მოხდენა
ზაზა ფაჩულიამ „არქი“ იყიდა