სოფელ ოძისში სარწყავი არხის გაწმენდა მიმდინარეობს. როგორც „ინტერპრესნიუსს“ დუშეთის მუნიციპალიტეტიდან აცნობეს, დუშეთის მუნიციპალიტეტის მერის მოადგილემ, ზაქარია ხეხელაშვილმა დღეს მჭადიჯვრის ადმინისტრაციულ ერთეულში, სოფელ ოძისში, მიმდინარე სარწყავი არხის გაწმენდითი სამუშაოები დაათვალიერა.

დუშეთის მუნიციპალიტეტის მერიის შუამდგომლობით, სამუშაოებს მელიორაციის რეგიონული სამმართველო ახორციელებს. ოძისი ოკუპირებული ტერიტორიის მოსაზღვრე სოფელია.

მუნიციპალიტეტის ინფორმაციით, სარწყავი არხი წლების განმავლობაში არ გაწმენდილა, ხოლო სამუშაოების დასრულების შემდეგ მოირწყვება არა მხოლოდ სოფელ ოძისის, არამედ სოფელ ილტოზას სახნავ-სათესი მიწები.