ქართული მხარის მიერ ჩატარებული სამედიცინო ექსპერტიზის დასკვნა არ იძლევა იმის თქმის საფუძველს, რომ არჩილ ტატუნაშვილი მოკლულია, - ამის შესახებ ინციდენტების პრევენციისა და მათზე რეაგირების მექანიზმის ფორმატში მორიგი შეხვედრის შემდეგ ოკუპირებული „სამხრეთ ოსეთის“ დელეგაციის ხელმძღვანელმა ეგორ კოჩიევმა განაცხადა.

„საქართველოს მიერ ჩატარებულმა სამედიცინო ექსპერტიზამ არ გასცა ნათელი პასუხი კითხვაზე, იყო თუ არა ტატუნაშვილი წამების მსხვერპლი. ამგვარად, ქართულ მხარეს არ აქვს საფუძველი თქვას, რომ მისი სიკვდილი ფიზიკური ზემოქმედების შედეგად დადგა“, - განაცხადა კოჩიევმა.

ის ასევე შეეხო „ოთხოზორია-ტატუნაშვილის სიას“ და აღნიშნა, რომ ცხინვალი საქართველოს მიერ ჩადენილი სამხედრო დანაშაულების სიას ამზადებს.

შეგახსენებთ, რომ 22 თებერვალს, საოკუპაციო რეჟიმმა საქართველოს 3 მოქალაქე - არჩილ ტატუნაშვილი, ლევან ქუტაშვილი და იოსებ პავლიაშვილი, ახალგორში დააკავა. 23 თებერვალს კი ცნობილი გახდა, რომ არჩილ ტატუნაშვილი გაურკვეველ ვითარებაში გარდაიცვალა.

26 დღის შემდეგ, 20 მარტს, წითელი ჯვრის საერთაშორისო კომიტეტის მეშვეობით ოკუპირებულმა ცხინვალმა არჩილ ტატუნაშვილის ცხედარი ოჯახს გადასცა.