საქართველოს პრეზიდენტის საერთაშორისო მდივნის თენგიზ ფხალაძის განცხადებით, ფაქტობრივად ყველა სახელმწიფოს მეთაურმა, როგორც ნატოს გენერალურმა მდივანმა ისე 29 ქვეყნის ლიდერმა ერთხმად აღნიშნა, რომ საქართველო არის ღირსეული, მნიშვნელოვანი და პასუხისმგებლიანი პარტნიორი. ფხალაძის განმარტებით, ყველამ ერთხმად დააფიქსირა ის პროგრესი, რომელსაც მიაღწია საქართველომ და აღინიშნა, რომ ის არის შთამბეჭდავი და სამაგალითო სხვა ასპირანტი ქვეყნებისთვის.
,,ამავდროულად მადლობა გადაგვიხადეს იმ მნიშვნელოვანი კონტრიბუციისთვის, რომელიც საქართველოს შეაქვს საერთო უსაფრთხოებაში.რამდენიმე ქვეყანამ სესიაზე მოითხოვა დაუყოვნებლივ საქართველოსთვის გაწევრიანების სამოქმედო გეგმის მინიჭება. საბოლოო ჯამში, ყველა ქვეყანა თანხმდება იმაზე, რომ საქართველოს დღეს აქვს ყველა პრაქტიკული ინსტრუმენტი, რომ მოემზადოს წევრობისთვის და რომ ერთად უნდა ვიმუშაოთ პოლიტიკური შესაძლებლობების ფანჯრის გახსნაზე და საქართველო მზად არის ამ დიალოგისათვის'', - განაცხადა თენგიზ ფხალაძემ.