ირაკლი კობახიძე - დარწმუნებული ვარ, გიორგი გახარიას ხელმძღვანელობით შს სამინისტროს სერიოზული პროგრესი ექნება

არასრულწლოვანთა მიერ ჩადენილი დანაშაულებების გამო, შესაძლოა კანონმდებლობა გადაიხედოს, - ამის შესახებ საქართველოს პარლამენტის თავმჯდომარეს, ირაკლი კობახიძემ ჟურნალისტებს შესაბამისი კითხვის საპასუხოდ განუცხადა.

როგორც ირაკლი კობახიძემ აღნიშნა, კრიმინალთან ბრძოლა ერთ-ერთი უმთავრესი პრიორიტეტია.

„მუშაობა წარიმართება მათ შორის საპარლამენტო ფორმატში. ამასთან დაკავშირებით, აქტიურად ვთანამშრომლობთ განათლების სამინისტროსთან. ერთ-ერთი სერიოზული პრობლემა არის ბულინგი სკოლებში. არის კონკრეტული ზომები მისაღები და სტრატეგია ჩამოსაყალიბებელი. ამაში პარლამენტი აქტიურად არის ჩართული. ყველა მიმართულებით არის სამუშაო. შინაგან საქმეთა სამინისტროში არსებითი ცვლილებები ხორციელდება. გიორგი გახარია სათავეში უდგას ამ პროცესებს და მისი ხელმძღვანელობით, დარწმუნებული ვარ, ყველა მიმართულებით იქნება პროგრესი. რა თქმა უნდა, კრიმინალთან ბრძოლა არის ერთ-ერთი უმთავრესი პრიორიტეტი და დარწმუნებული ვარ, გახარიას ხელმძღვანელობით შინაგან საქმეთა სამინისტროს ექნება სერიოზული პროგრესი ყველა მიმართულებით. მათ შორის კანონმდებლობაც შეიძლება გადაისინჯოს, თუ ეს არის საჭირო“, - განაცხადა კობახიძემ.