“ჯორჯიან უოთერ ენდ ფაუერი“ მე-2 საერთაშორისო კონფერენციას მართავს

კომპანია “ჯორჯიან უოთერ ენდ ფაუერის“ ორგანიზებით, რიგით მეორე საერთაშორისო კონფერენცია მიმდინარეობს, რომელიც წყალმომარაგების დარგის სისტემურ განვითარებას ეძღვნება.

როგორც “ინტერპრესნიუსს“ კომპანიიდან აცნობეს, კონფერენცია „ჯორჯიან უოთერ ენდ ფაუერის“ გენერალურმა დირექტორმა, გიორგი ცხადაძემ გახსნა.

კონფერენციის მონაწილეებს საქართველოს ვიცე-პრემიერი, რეგიონული განვითარებისა და ინფრასტრუქტურის მინისტრი, მაია ცქიტიშვილი მიესალმა და ხაზი გაუსვა, რომ ჩვენი ქვეყნისთვის წყალმომარაგების სფეროს სისტემური განვითარება უმნიშვნელოვანესი საკითხია.

„მივესალმები gwp-ის ინიციატივას გავაერთიანოთ ჩვენი ძალისხმევა ამ სფეროს სისტემური განვითარების ირგვლივ“, - განაცხადა მაია ცქიტიშვილმა.

საერთაშორისო კონფერენციაზე სიტყვით საქართველოს ენერგეტიკისა და წყალმომარაგების მარეგულირებელი ეროვნული კომისიის თავმჯდომარე, ირინა მილორავა, თბილისის საკრებულოს თავმჯდომარე, გიორგი ტყემალაძე და დედაქალაქის მერის მოადგილე, ირაკლი ბენდელიანი გამოვიდნენ.

კონფერენციაში მონაწილეობას „ჯორჯიან უოთერ ენდ ფაუერთან“ ერთად, საქართველოს წყალმომარაგების სექტორის და gwp-ის პარტნიორების, ევროპის ლიდერი კომპანიების პირველი პირები იღებენ. საუკეთესო პრაქტიკის გასაცნობად, ღონისძიებას გერმანიიდან, ესპანეთიდან, პოლონეთიდან, რუმინეთიდან, დანიიდან ჩამოსული წყალმომარაგების კომპანიების ხელმძღვანელებიც ესწრებიან.

„ჩვენი კომპანიის მენეჯმენტი ორიენტირებულია გრძელვადიან მიზნებზე, კომპანიის სისტემურ გაუმჯობესებასა და სერვისის სტაბილურობაზე“, - აცხადებს „ჯორჯიან უოთერ ენდ ფაუერის“ გენერალური დირექტორი, გიორგი ცხადაძე.

საერთაშორისო კონფერენციაზე „ჯორჯიან უოთერ ენდ ფაუერის“ წარმომადგენლები იმ სიახლეებზე საუბრობენ, რასც კომპანია საერთაშორისო ლიდერ ბრენდებთან ერთად საქართველოში ნერგავს. თავის მხრივ, უცხოურმა წყალმომარაგები კომპანიები და მწარმოებლები ერთმანეთს საერთაშორისო გამოცდილებას უზიარებენ.