ბორჯომის მუნიციპალიტეტის მერმა ლევან ლიპარტიამ, მერის მოადგილემ ბუბა ბერიძემ და კულტურის სამსახურის უფროსმა მარინა ხუჯაძემ დღეს პოლონეთის დელეგაციას უმასპინძლეს, - ამის შესახებ „ინტერპრესნიუსს“ ბორჯომის მერიიდან აცნობეს.

მათივე ინფორმაციით, ადგილობრივი ხელისუფლების წარმომადგენლებისა და ბორჯომთან დამეგობრებული ქალაქ ლეგიონოვოს ხელმძღვანელი პირების საუბარი საზოგადოების საქმიანობის სხვადასხვა სფეროს შეეხო და აქცენტი ორ დამეგობრებულ ქალაქს შორის ურთიერთობის გაღრმავებაზე გაკეთდა.

„ხელმძღვანელმა პირებმა საგანმანათლებლო პროგრამებიც განიხილეს, სადაც ქართველი და პოლონელი მოსწავლეები ჩაერთვებიან. ამ მიზნით, მოგვიანებით, შეხვედრა მუნიციპალიტეტის სხდომათა დარბაზში გაგრძელდა. ინიციატივა პოლონელმა მხარემ ბორჯომის საჯარო სკოლების დირექტორებსა და მუნიციპალიტეტის თანამშრომლებს გააცნო”, - აღნიშნულია ინფორმაციაში.

როგორც ინფორმაციაშია აღნიშნული, ლეგიონოვოს მერის რომან სმოგორჟევსკის თქმით, კარგი იქნება, ორმხრივი პროექტების განხორციელება, რომელიც საშუალებას მისცემს ქალაქებს უკეთ გაეცნონ ქვეყნების გამოცდილებას, განსაკუთრებით ეს განათლების სფეროში იქნება მნიშვნელოვანი. მისივე განმარტებით, პირველ ეტაპზე, ოქტომბრის თვეში იგეგმება ბორჯომის სკოლის დირექტორების მიწვევა პოლონეთში.

ბორჯომის მუნიციპალიტეტის მერიის ცნობით, პოლონელი სტუმრები ბორჯომში რამდენიმე დღეს გაატარებენ და სხვადასვხა ღონისძიებას დაესწრებიან.

ქალაქები ბორჯომი და ლეგიონოვო დამეგობრებული ქალაქების სტატუსს 2015 წლიდან ატარებენ.