რეგიონული განვითარებისა და ინფრასტრუქტურის მინისტრის მოადგილეები სტიქიის შედეგების სალიკვიდაციო სამუშაოებში ერთვებიან. როგორც „ინტერპრესნიუსს“ რეგინული განვითარებისა და ინფრასტრუქტურის სამინისტროდან აცნობეს, მინისტრის პირველი მოადგილე, საავტომობილო გზების დეპარტამენტის თავმჯდომარე ირაკლი ქარსელაძე ყაზბეგის მიმართულებით არსებულ ვითარებას ეცნობა და მუნიციპალიტეტებში მიმდინარე სარეაბილიტაციო სამუშაოებს საჭირო ტექნიკით უზრუნველყოფს.

მათივე ინფორმაციით, მაია ცქიტიშვილის მოადგილე ილია ბეგიაშვილი სამეგრელოში გაემგზავრა, სადაც ადგილობრივ ხელისუფლებასთან ერთად, სტიქიის შედეგების სალიკვიდაციო სამუშაოებში ჩაერთვება.

ასევე, მინისტრის მოადგილე გრიგოლ კაცია აჭარაში ჩავა, სადაც კოკისპირული წვიმის შედეგად პრობლემები შეიქმნა და საგანგებო სიტუაციების მართვის სამსახურში ასზე მეტი შეტყობინება შევიდა.