ევროკავშირი დადებითად აფასებს და მხარს უჭერს საქართველოს მთავრობის მიერ ადამიანის უფლებების კუთხით განხორციელებულ და მიმდინარე რეფორმებს, - ამის შესახებ საქართველოს პრემიერ-მინისტრმა მამუკა ბახტაძემ მთავრობის სხდომის დაწყებამდე განაცხადა. მისი თქმით, ამას ადასტურებს ის, რომ საქართველო ადამიანის უფლებების სფეროში მოწინავე სახელმწიფოებთან მოხვდა.

„მინდა, შევეხო ძალიან მნიშვნელოვან აღიარებას. საქართველო ადამიანის უფლებების დაცვის მიმართულებით გაწეული წარმატებული მაგალითებით მსოფლიოს 13 ქვეყანას შორის მოხვდა. განსაკუთრებით სასიხარულოა, რომ საქართველო ადამიანის უფლებების სფეროში იმ 13 სახელმწიფოს შორის არის, სადაც ჩამოყალიბდა და დამკვიდრდა ადამიანის უფლებების დაცვის ძალიან ძლიერი სისტემა. ეს კიდევ ერთხელ ადასტურებს, რომ ევროკავშირი დადებითად აფასებს და მხარს უჭერს საქართველოს მთავრობის მიერ ადამიანის უფლებების კუთხით განხორციელებულ და მიმდინარე რეფორმებს. განსაკუთრებით ხაზი უნდა გავუსვათ პენიტენციურ სისტემაში არსებულ პროგრესს. თქვენ იცით რა უმძიმესი ვითარება ჩავიბარეთ ამ კუთხით. ჩვენი ქვეყანა არის ერთადერთი ქვეყანა, რომელიც ამ სიაში მოხვდა“, - განაცხადა ბახტაძემ.