მოსკოვის საქალაქო სასამართლომ საქართველოს 55 წლის მოქალაქეს, რომელმაც რკინიგზის ერთ-ერთ სადგურზე დანით ორი ადამიანი დაჭრა, აღკვეთის ღონისძიების სახით წინასწარი პატიმრობა მიუსაჯა. ამის შესახებ „ტასს“ მოსკოვის სატრანსპორტო პროკურატურის პრესსამსახურში განუცხადეს.

მათი ინფორმაციით, 10 სექტემბერს კურსკის რკინიგზის სადგურის ერთ-ერთ დარბაზში ბრალდებულმა ყოველგვარი მიზეზის გარეშე, დანით დაჭრა ახალგაზრდა მამაკაცი, შემდეგ კი, ახალგაზრდა ქალს რამდენჯერმე დაარტყა დანა თავისა და მუცლის არეში.

პოლიციელებმა თავდამსხმელი შემთხვევის ადგილზე დააკავეს.

უწყებაში ასევე აღნიშნავენ, რომ მანამდე ბრალდებულს მკვლელობის მცდელობისთვის 11- წლიანი პატიმრობა აქვს მოხდილი.