თბილისის სახელმწიფო სამედიცინო უნივერსიტეტის გივი ჟვანიას სახელობის პედიატრიის აკადემიურ კლინიკას ისრაელის დელეგაცია ეწვია.

როგორც „ინტერპრესნიუსს“ თბილისის სახელმწიფო სამედიცინო უნივერსიტეტიდან აცნობეს, დელეგაციის შემადგენლობაში არიან: თელავივის უნივერსიტეტის მედიცინის ფაკულტეტის პროფესორი, ისრაელის ბავშვთა ქირურგიული სამსახურის მთავარი ექსპერტი, პროფესორი იცხაკ ვინოგრადი; ჰაიფას სამედიცინო (რამბამ) ცენტრი, ბავშვთა ქირურგიის და ტრანსპლანტაციის დეპარტამენტის ხელმძღვანელი, პროფესორი რან შტეინბერგი; მინი ინვაზიური (ლაპარასკოპიული) ქირურგიული სამსახურის უფროსი, პროფესორი არკადი ვაჩიანი; ინტენსიური თერაპიის და კრიტიკული მედიცინის დეპარტამენტის ხელმძღვანელი, პროფესორი ჯოსეფ ბენარი; ახალშობილთა ინტენსიური სამსახურის უფროსი, პროფესორი ამირ ჰადაში და ანესთეზიოლოგიური სამხახურის უფროსი ამით ლეჰავი.

როგორც სამედიცინო უნივერსიტეტში აცხადებენ, პროფესორების ვიზიტის მიზანია სტუდენტთა, რეზიდენტთა, აკადემიური პერსონალის და კლინიკის სამედიცინო პერსონალის კვალიფიკაციის ამაღლება; ურთიერთგამოცდილების გაზიარება, რაც საბოლოო ჯამში გაზრდის დიაგნოსტიკის და მკურნალობის დონეს და ხელს შეუწყობს მათ მიახლოებას ევროპულ სტანდარტებთან. ვიზიტის ფარგლებში დაგეგმილია სალექციო კურსის ჩატარება. კერძოდ, შემდეგ საკითხებზე: „შოკი“ - პროფ. ჯოსეფ ბენარი;

,,ექსტრაკორპორალური მემბრანული ოქსიგენაცია (ECMO)“ - პროფ. ამირ ჰადაში.

„თავის ტრავმები/დაზიანებები“ - პროფ. ამირ ჰადაში

„რესპირატორული უკმარისობა”- პროფ. ჯოსეფ ბენარი

„ახალი ჰორიზონტები პედიატრიულ ქირურგიაში: ნაყოფის ოპერაცია და რობოტული ქირურგია“- პროფ. რან შტეინბერგი

„ღვიძლის ტრანსპლანტაცია“ - პროფ. რან შტეინბერგი

„ამასთან, დაგეგმილია ურთულესი ქირურგიული ოპერაციები, მათ შორის ზოგიერთი უკვე ჩატარებულია მათ მიერ და საჭიროებს შემდგომ ეტაპს - რეოპერაციას: თანდაყოლილი ანორექტალური მალფორმაციები;

დიაფრაგმის თიაქარი; გასტროეზოფაგალური რეფლუქსი. ვიზიტისას ასევე ჩატარდება პაციენტთა კონსულტაციები“, – განმარტავენ სამედიცინო უნივერსიტეტში.