პარლამენტის თავმჯდომარის ირაკლი კობახიძის განცხადებით, „ქართულ ოცნებაში“ ამ ეტაპზე არავითარი ფუნდამენტური საკადრო ცვლილებები არ იგეგმება.
„არავითარი ფუნდამენტური საკადრო ცვლილებები ამ ეტაპზე არ იგეგმება, თუმცა ჩვენ გვჭირდება კადრების გადახალისება. 2020 წელს იგეგმება საპარლამენტო არჩევნები, მანამდე კი გვჭირდება მომზადება იმისთვის, რომ სათანადო სიით წარვსდგეთ არჩევნებზე“, - განაცხადა კობახიძემ.
რაც შეეხება ყოფილი პრემიერის, ირაკლი ღარიბაშვილის „ქართულ ოცნებაში“ შესაძლო დაბრუნებასთან დაკავშირებით გაკეთებულ განცხადებებს, პარლამენტის თავმჯდომარის თქმით, „ამ კუთხით არანაირი სიახლე არ არის“.
შეგახსენებთ, რომ „ქართული ოცნების“ ლიდერებმა პარტიაში საკადრო ცვლილებები ღიად დააანონსეს და ამ თემაზე არაერთი განცხადება გააკეთეს.