რუსთაველის გამზირზე აქცია „არა ნაციზმს“ დასრულდა. აქციის მონაწილეებმა დღეს 11 წლის წინ განვითარებული მოვლენები გაიხსენეს და აღნიშნეს, რომ წინა ხელისუფლების რეჟიმი საქართველოში აღარ უნდა დაბრუნდეს.
მათივე განცხადებით, 7 ნოემბერს მომხდარი მოვლენები არ იყო ხელისუფლების მხრიდან დაშვებული შეცდომა, არამედ ეს იყო მიზანმიმართული დანაშაულებრივი ქმედება, რომელმაც ხელი შეუშალა ქვეყნის დემოკრატიულ განვითარებას. მათივე შეფასებით, 7 ნოემბერი არის დღე, როდესაც დაიწყო „ნაციონალური მოძრაობის“ რეჟიმის დასასრულის დასაწყისი.
აქციის მონაწილეები მოუწოდებდნენ დღევანდელ ხელისუფლებას, რომ კანონის შესაბამისად გაასამართლოს ყოფილი ხელისუფლების წარმომადგენლები, რომლებიც მონაწილეობდნენ 7 ნოემბრის მოვლენებში. აქციის მონაწილეების ნაწილი კი მოქალაქეებს მოუწოდებდნენ, რომ მივიდნენ არჩევნების მეორე ტურზე და მხარი დაუჭირონ „ქართული ოცნების“ მიერ მხარდაჭერილ კანდიდატს სალომე ზურაბიშვილს, რათა ხელისუფლებაში კვლავ „ნაციონალური მოძრაობა“ არ დაბრუნდეს.